PUISI BAHASA MANADO IVERDIXON TINUNGKI

PUISI BAHASA MANADO IVERDIXON TINUNGKI

CA, MULU BASAR

Ca, ngana memang mulu basar

badang basar tolor basar

mar ontak tai sasaja

kiapa ini dunia so ngana punya Ca,

“Ca, bahaga ganas

depe hati mulai ta ramasramas”

Ca, ngana memang kapala basar

biongo paling basar

stel pande mar nol basar

so ngana no tu ontak udang paling basar Ca,

“Ca, badiri kage

langsung mangamu nyanda karuang”

Ca, kaskado

Ca, tai minya

Ca, panako

“Ca, badusu

rupa gaya setang gomutu

pake dodutu

akhirnya tagate di pintu

depe mulu tajumu di abu

lulo trus cibubu”

Ca, badiri tapi langsung tadudu

rupaya captikus so ojo depe bukubuku

kong supi ajar deng manucu

Ca, manangis rupa setang piatu

anakanak bagara mar dia so matikutu

bagitu kalo hidop so malimbuku

KASKADO

cuka minya

kaskado ngana memang banya tai minya

waktu jadi gubernur dari tanah sampe umur

samua ngana gusur kase maso liang kubur

biar so tua

banya calana masih ngana lucur

apa ngana pikir panta rupa pintu atou jandela

buka tutu iko ngana pesuka

kalo bicara ngana rupa dewa

mar ngana peburung kakatua nda pake mata

ta salah langkah orang pe bini boleh cilaka

kaskado ngana memang bajingan

soal bajanji nyanda depe lawang

mo tunggu musti sadia umur panjang

bicara gorela, so ngana tu gorela pe nenek moyang

proyek apa yang nyanda ngana makang

enter yang siluman bekeng ngana kanyang

kaskado…kaskado

ngana memang baline gampang?

KALO INGA CEWE LAMA

kalo inga cewe lama

pasti inga gofela

karena tampa baku dapa

di pinggir sabuah soma

maklum blum ada mall deng pup

jadi di paserpaser so rasa sadap

“ojo Po,” Sindulang bilang.

kadang baku dapa di pesta katrili deng volka

rupa kisah putri salju deng sinderella

badansa sampe so pokapoka

kalo inga cewe lama

pasti inga kacang deng pisang

itu camucamu kalu bagadang di rumah

pas tvri siaran dunia dalam berita

capat ba angka

jang mamantu sirang deng aer rica

OPA PE PESAN PA CUCU

Amang, kalo basar kamari

jangang ngoni baku pangge prang

karna di prang kalah jadi arang

menang jadi abu

opa so pernah iko prang dunia

prang permesta

jadi opa so kanyang lia aer mata

di prang nyaada cirita tamang atau sodara

sekali musuh, baku sapu rata deng sanjata

Amang, kalo basar kamari

ator di dunia bakubaku sayang

bakubaku bae

biar samua damedame

mar jangan kase biar

kalo orang baniat mo injang

cukup tangka di pantaleher

kong banting di aspal sampe dia peper

POLOTIK GAYA BEBE

masih pagi Neles dapa lia so weles

waktu kampanye Neles fresco en neces

Anes bilang maklum; “dia kwa tim sukses”

di mana calon pigi, di situ Neles pigi

di mana calon basinggah, di situ Neles basinggah

saat calon kalah, Neles pe semangat trus patah

rupah tusa jatuh di tai minya

Anes bilang maklum;

“polotik gaya bebe mana mo dapa suara

tim sukses cuma ikoiko calon pe panta”

laste tangangahngangah

di tps nya ada suara

POLOTIK GRAP-GRAP

orang manado bilang

polotik bukang polo kong ketik

kalo polo kong ketik

bekeng puru si polo dapa lia antik

mar polotik memang ada hubungan

deng polo kong ketik

cuma batas polopolo kong gelitikgelitik

ini tu manado pe gaya ba polotik

depe intrik cuma rupa kolotidi kena listrik

polotik dulu memang beda deng polotik skarang

polotik dulu polo deng banya taktik

polotik skarang cuma polo kong bise somo lantik

abis pilwako samua mulai basambunyi rupa kodo

manggoro di lobang ba pangge ujang

datang banjer samua kaluar bajejerjejer

minta sumbangan deng emberember

kasiang kandidat yang lante

masih baku dapa deng tanta tante

yang tanta so nda farek mo bakugepe

yang tante babale muka deng gaya ondeonde

polotik memang bekeng totorofe kalo ta soe

kalu ta sua bekeng simore

pas menjabat langsung totofore

kalo kpk kurang ja korekore

ini puisileh rupa mulu pante

polotik kurang da balebale

rupa panta so tarabe

punung deng setang putar pe putar bale

MANTRA BATU ORANG SINDULANG

batu api, batu badaong

kapala batu mati bagantong

batu kubur, batunangan

badang subur sapa pe tunangan

batu saiki, tanjung batu

sasadiki baku dusu baku lempar batu

kapala batu, kapala kore

miskin malendong, bajalang totofore

so itu jang talalu simore saat umur masih toretore

ator tu hidop baebae supaya kalo umur so sore

nyanda dapalia kremos rupa ayang bagonone

PANTE DALODA

Sindulang itu

dari Malalayang sampe Tumumpa

Pite bilang Bulango pe tampa

enter gofela kanal pa Daloda

nenegohu!

kiapa so jadi kapistakapista punya

so ini no tu pamarenta pe durhaka

MUMAKE ORANG PANTE

bicara borgo, bicara Kastela

gofela ditesta jang ngana paka deng tela

sungguh mati kita momake sampe kana tapelapela

“Dogi, ngana rupa babi jo”

anjing pe salah, babi yang dapa marah

bagitu orang pante kalo so nae darah

pi di pante jang barani tanang panta

atau lewat deng muka pustema

itu sama deng pangge bakalae pa gorela

baju tarabe bibir pica, abis cirita

mar nda samua momake berarti marah

babi anjing boleh jadi karena rasa sodara

SATU LAGU DARI JAMAN PASAR CITA

anak duludulu dorang bilang anakanak kornaus

begal kong pang ba terek mampos

kalo lewat pa Om Endi pe rumah dorang manyanyi;

“Om Endi nae di bendi

bola taputar Om Endi talempar”

Om Endi kaluar kong dusu deng mafafa

Kalo lewat pa cewe feodal pe rumah dorang manyanyi;

“pagi-pagi bajang ka tanjung

pakeang putih nona gepe deng payung”

cewe manangis

depe papa kaluar kong bafeto deng bahasa Balanda

ngoni kira kornauskornaus mo tobat

beso dong lewat kong manyanyi ulang

untung kalakuang ini so nya ada

barani masih ada

bukang sadiki orang bangka dada

TAI MINYA

waktu pae jadi bos pabrik minya kalapa
tai minya tong ja ambe for pake momasa

tapi jaman so barobah
enter minya tanah so ganti deng gas
pabrik minya kalapa so kurang besi bakas

tai minya so pindah ke gedunggedung berkelas
dari jakarta sampe miangas
so jadi tai minya pe markas

orang manado memang paling karas
urusan tai minya deng baku gas
baku cungkel sampe samua jadi ampas

apalagi politisi pe gaya
enter pandeta dong suruh cuci depe kaki
dasar ontak puki
halhal suci dorang so kabirikabiri

no bagaimana urusan doi nyanda korupsi
pas bangung pagi so bapikir minya pe tai

kasiang skali rayat pe nasib
salah sadiki tembak di kaki
yang korupsi pe banya skali
dong kase biar pake dasi

ini memang
tai minya pe mai!

BICARA UBI KUPAS

bicara bitis ada dua jenis:
ubi kupas
kuli ubi

bicara ubi banya jenis
cuma ubi taong ngana musti cabu deng linggis

bicara ubi kupas
ngana musti siap doi satu tas

bicara kuli ubi
jang karaskaras
jang dia rako ngana deng panta galas

bicara cinta
cari pasangan yang jelas
jang cuma baku tumingkas
deng orang pe bakas

karena berumah tangga
bukan cuma urusan parkakas

cari yang ikhlas
sayang pa ngana
sampe gigi rope deng napas talapas

BINONGKOL

ikang putih
bakasang pidis
binongkol tindis deng tustus nasi

minya angus
dabudabu tarasi
binongkol cibako deng ubi putih

ma mantu jatuh di parigi
ngoni kira binongkol ba cigi?

bini bafeto
binongkol rako sampe bengko

sapa mo blok
hele pa mantu
binongkol tarapu deng batang sosapu

laste binongkol bini kase cere
manangis tasiguju
rupa tusa abis bulubulu

di degodego bonongkol merenung
manyasal hidop lontanglantung

mo minta ampung
bini so kaweng baru deng tantara fasung

binongkol mo apa
baru mo haga so taberabera

no apa!
talang bom jo ngana anjingtana

POKPOK

tempo pokpok ada di bokbok
sekarang pokpok so pindah di rok

tempo pokpok bekeng tako
sekarang pokpok bekeng hidop lebe hidop

losta masta, iklan bilang

ta los kata
langsung bakasta

ya bagitu
kalo ontak kapista

DONG BILANG

dong bilang laki-laki parlente caparere
dong bilang parampuang dos padede

di lorong pas bencong lewat;
co ngoni bilang ampibi
kalo dia nya silet
kong garo sampe tarabe

MANADO WAKTU KACILI

inga calana cidako
bagantong di bemo
karena hidop susah mareno

sadiki-sadiki dapa dengar
parampuang baku rado

kampong arab, kampong cina so di situ
nyanda jao dari tampa bajual katu deng tali gomutu

kalo bablanja ka pasar cita
pasti baku dapa tukang jual oba pe tai minya

toko jempol bioskop benteng
samasama tua deng gereja sentrum
alamatalamat for baku dapa
kalo bapontar di ampa lima

susah juga mo lupa pagar besi
lontelonte deng banci pe tampa
tukang mabo juga di sana

masa kacili memang grap-grap;

pancuri kalapa muda di ondernemeng
tukang jaga dusu deng peda popo
lari rupa setang blao
badang abis maemosa garo

OM TUA STEL KOBOI

om tua stel koboi
turun mikro ba kore gigi
bahaga cewe panta sambiki
etag sadiki kong supi cigi

pulang pagi ba tate-tate
rupa gonone di igu-igu
topi jatung ka panta leher
bini so tunggu deng sosapu gumutu

adoh kasiang hidop bagitu
rumah pitate tongka deng bulu
kiapa ba pikir rupa dulu-dulu
masa gorela pemalimbuku

adoh pace, jaman so barobah
hele frak oto so ampa ribu
samua so nembole ator cuma deng mulumulu
musti karja sampe tabirubiru

KALO INGA HELA SOMA

malangmalang dudu di kana
dengar panggayung babunyi di sope
parao lampu kase kode
lasau taribe masanae momake

bagitu tradisi pante
parenta deng puki cibubu di mulu
mar di hati, doa ndak pernah tarabe

kita inga sekali opa beji deng om podung
dua henar soma dampar badang basar
datang ka daseng tiki pinggang
jang banya mulu, kalo suka nya ta lempar

cari hidop di lao nembole lombo
gofela deng sisi kurang user deng api
pokpok deng songko lempar kolongkong
torang bataria akang taripang gorango

rame deng tako tacampur rupa gohu
pidis rica, pidis goraka
katakata abis baku pukul deng mafafa

memang kalo inga hela soma
bobou tindipang bakarjengki sapa mo pele
sindulang karangria haluang kamudi
pulang pagi gigi masih totorofe

bulang basar datang torang pigi bagadang
cewe sindulang karangria pande bapake
rupa sinderela karna endo deng keke
idong badiri, rambu kuning bamerah
sun sadiki, tagate di madumi

mar kalo cinta
bibir bagarang campur captikus
muka kremos taangusangus
nyanda parduli yang peting tau katrili
badansa sampe pagi pica di kaki

BETO

beto memang binongkol
dulu dia orang basar
mar tagate korupsi kong maso bui
kalo hitung umur so bobou liang kubur
mo apale nama Beto so jadi bubur

kalo tengo tempotempo
Beto nyanda lebe dari tukang cukur;
--cukur sana, cukur sini—
akhirnya cukurungan, kasta masoso ka politik;
--tandu sana, tandu sini--
taangka ketua partai
nyanda banya orang sangka
binongkol jadi pejabat basar

bicara hobi, binongkol suka koleksi ayang
terutama ‘ayang kampung’
dengan ayang bataru kancingan
beberapa ayang kampung cubiraka jadi anggota DPR

ayangayang kancingan dia kase nama mani
kiapa mani?
“karena mani depe ujungujung kejantanan!”
begitu ni binyolos bilang

kong babadiang dia so ada julukan;
“parlente tua nafsu klewang”

mar laeng dulu, laeng sekarang
pas kaluar bui, ayangayang kampung so ba laeng
hele haga pa binongkol so malas
ayang kampung so nemau ba bos pa Beto
ayang kampung so diternak bos baru
lebeh forsa lebeh fresco dari Beto

Beto sedih, Beto rasarasa mo manpos flao
depe kumis baputi dia cukurcukur pake tamako
so tua ngana Beto, so paroro
so ndak kuat mo parara, begitu tuminting pe istilah

sendisendi so totorofe
bajalang so bongkobongko
daging deng kuli so tabembengbembeng
tulangtulang so peot
bicara so hosahosa
rupa sapi ofu so cibako
ka manamana orang kurang tengo mata sablah
apalagi pi jalang roda
kurang dorang mo sirang deng kopi stengah

ya nasib mo bilang apa
kurang talang bom jo lebe bagus ngana;
bagitu kirakira orang sindulang bilang

ada bagusbagus kwa suka maso bui
kurang bagus hagahaga kandang
mani so nyanda, mani so dada
apa le ngana mo bangga
enter talang ludah so siksa

suka gale lobang?
no baisi jo ka dalang;
bagitu istilah orang Bailang

SAYANGNGE

nona putih dapa laki berebere
minta ciong adoh
minta polo flao

nona putih dapa laki pang ba mabo
pagipagi muka so bengko

nyong putih dapa bini pang bafeto
sasadiki kao
kalo marah rado

nyong putih dapa bini rambu kribo
soresore so tafiaro

nyong putih nona putih baku kaweng
dapa anak endo
kalakuang gorango

gorango deng gorango baku kaweng
depe laste anak caparere

rasa sayangnge
tempo apa nona itang tagate
sio nona sayangsayangnge

rasa sayangnge
tempo apa nyong itang tagepe
sio nyong sayangsayangnge

nyong itang nona itang baku kaweng
dapa anak budo
birman baku bise

birmanbirman pagipagi so karlota
depe laste dorang bakalae

“dasar manado karlota!”

CINTA ANGUS JADI TAI MINYA

nona o nona
kalau bukang Tuhan kase baku dapa
mana boleh tanah kase bunga dalam titimangsa

mar beribu sajak apa guna nona
kalo aer mata selalu jatuh picah ka tanah
pujangga atau lawer sama saja
kalau cinta angus jadi tai minya

kasiang jo ni hati
fugado gila
maleleh di jalang, merana
batunggu anging
rupa tiang garang

cukup jo Lot pe bini
jang kita kasiang

bayangan bayang babi utang
bayang bayang setang
gentayang di tikung jalang
so nyanda ngana pe bayang di sana nona

tuangali jo nona
siksa hidop
kaleleran sampe pokapoka
model kapista

 

DARI SNDULANG SAMPE MALALAYANG

dari Sindulang sampe Malalayang
yang kita inga adalah pante
nona nonas manis lari rupa burung
dan basambunyi di pohong bahu

kita di sana sebelum laut pamerenta ambe dari rayat
jadi boulevard
jadi milik saudagar cina
otooto mewah lewat
rakyat kacili di mana dorang pe tampa

dari Sindulang sampe Malalayang
yang kita inga adalah cinta
nona manis nyong pranggang baku gandeng
rupa peri di cerita dongeng
manari cakalele
batunggu masanae bawa ikang dalam sope

kita di sana sebelum laut pamarenta ambe dari rayat
jadi hotel, supermarket, diskotik dengan saribu maksiat
yang cuma kase sanang orang kaya
rayat kecil dimana dorang pe tampa

dari Sindulang sampe Malalayang
yang kita inga adalah tandusang
anakanak bamaeng bola siapa kalah bapompa
dan kalo so malang
helahaluang babunyi
lampu kana pasang di paser
opa Beji batiki pinggang
soma dampar pasang belo
nonanona manis lari di paser
bitis putih muka endo
kalo kaweng pasti sewa musik Tanawangko
manari kratrili deng badansa volka
hingga hari so ba pokapoka
pulang sanang kong gandeng cewe orang Sindulang

kita di sana sebelum laut pamerenta ambe dari rayat
dan sekarang torang samasama lupa
kalau dari Sindulang sampe Malalayang bukan lagi
torang punya.