MANADO DALAM PUISI ENAM, PUISI BAHASA MANADO IVERDIXON TINUNGKI

 PUISI-PUISI KARYA IVERDIXON TINUNGKI

JANJI KONGA

ada satu Manado pe payah

suka bajanji mar janji konga

cirita so sampe di Klabat pe testa

ujungujung konga samua

ini sebenarnya kalakuang jaman parmesta

pukul carita deng janjijanji sagala rupa

enter ayang so kincing tu janji tara mo dapa

soal ba konga miskin deng kaya nya depe beda

apalagi politisi pe carita konga

manis di bibir, mar lida tulang sasaja

barani ngoni parcaya “kasiang pirua”

so di situ no ngoni taboto gaga

KITA SALALU JATUH CINTA

kita salalu jatuh cinta

lia kusukusu babunga

dapa inga mama papa

ajar hidop musti tabah

memang kusukusu lambang derita

kalu tabah salalu ada yang indah merekah

itu sebabnya kita salalu jatuh cinta

lia bunga kusukusu pe rupa

kalo hidop berat dan sulit, kata mama

so pasti hati rasa tairis

jang putus asa rusak diri

sebab inga torang ada Tete Manis

hidop dalam susah atau sanang

tong musti jadi manusia tau sambayang

lia kusukusu nda pernah rasa kesepian

Tete manis jaga dia tumbuh sampe babunga

memang akhirnya samua akan piatu di dunya

mar orang tua pe bae jang tong lupa

ka mana ni aros hidop mo bawa

tong musti jadi manusia yang punya cinta

GARAGARA BOGOBOGO

bicara bogobogo

bicara sisi hidop laolao

salalu bapikir diri sandiri paling jago

padahal ontak cuma rupa bulang makarao

garagara bogobogo

pikiran jadi bingobingo

gelisah senoseno

kong bapikir popopopo

karna ontak ndak ta buka jaoh

balajar puipui pokospokos deng opoopo

vor bekeng mulus kata ni hidop pe rotoroto

adoh! Ini no kalo biongo

nentau ni hidop bajalang pe laju

jang bapikir masih rupa jaman daong sosoro

pasti tatinggal bahaga kanokano

enter tibotibo skarang so pake oto

masihleh ngoni tidor sono kong manggoro

bangung opo. bangung!

ini hidop musti baku kukavo sampe bengkobengko

karja sampe ta flaoflao

kase tinggal tu pikiran taibalao

KADELEI KELEDAI

“ilelee…ilelee
indala ya indala”

ini puisi dari jaman Sanger pe nene moyang tua

dorang bangga tong pe tanah aer yang raya yang indah

Papua Sulawesi Kalimatan dan Jawa

samua basudara satu nusantara jaya

sungguhsungguh torang cinta

mar…

hari ini

kitong rupa keledai

keledai makang kadelei

lupa kalu tanah aer ini; gemah ripah loh jinawi

hari ini

kedelei itu makang keledai

kedelei keledai
keledai kedelei
ilelee…ilelee
indala ya indala

hari ini

kitong lupa; gemah ripah loh jinawi

megah biodiversity, plasma nutfah

yang raya yang indah pa kitorang pe tanah

keledai itu lupa negeri ini banya makanan
kiapa dia makang kedelei impor

kiapa kedelei di 192 juta hektar tanah dong larang tumbuh

sederhana…

karena ternyata

ini keledai suka tagategate di kedelei

ilelee…ilelee
indala ya indala:

enter garang deng ikang tong impor!

di mana tong pe tanah aer pe cerita kejayaan. pamarentah

so ndak menjamin kedaulatan swasembada pangan.

pamamarentah so ndak tahu kebutuhan rayat. hidop di negara

agraris nasib petani lebeh jaha dibanding negara non agraris.

hidup di negara maritim nasib nelayan  lebeh jaha dibanding

negara non maritim. Ini miskin so rupa bayangbayang setang

turus tabayang. tabayangbayang. ironis memang.

ilelee…ilelee
indala ya indala

CARITA PARIWISATA

jual apa tanta?

pisang goroho deng dabu roa!

jual apa walikota?

sudah jo jang banya tanya!

turis datang

pi pante cari panta

kong makang pisang goroho dabudabu roa

pas kanyang

turis pe muka so dapa lia rupa ikang goropa

merah kong so suka maso liang goa

depe eso:

jual apa tanta?

tinutuan deng nike goreng!

jual apa walikota?

sudah jo jang banya tanya!

turis datang

pi pante cari panta

kong makang tinutuan deng nike goreng

pas kanyang

turis langsung pamit pulang

kita tanya; kiapa ngana capat pulang?

bekeng apa lamalama,

yang ngoni sidoa cuma urusan poloi deng makang

yang bagitu pa kita pe negara le ada!

no yang ngana suka apa so?

mo lia indahnya ngoni pe budaya!

--ini turis butulbutul dapa torang pe payah