MANADO DALAM PUISI TIGA, PUISI BAHASA MANADO IVERDIXON TINUNGKI

PUISI-PUISI KARYA IVERDIXON TINUNGKI

MANADO MOOI

manado memang mooi

banya tampa indehoy

dari kantor sampe loby

semua bicara urusan gidigidi

manado memang mooi

anak muda suka yang assoy

nyanda pikir sanasini

akhirnya kurang kaweng konvoi

manado memang mooi

soal gaya deng urus diri

karena hidop belum mampu mandiri

laste jadi papancuri

manado memang mooi

banya politisi rupa kurcaci

puji sana puji sini

biar ndak doi mimpi jadi walikota atau bupati

manado memang mooi

depe pengusaha rupa bivi

sogok sana sogok sini

akhirnya karja proyek rugi

manado memang mooi

bini sasadiki lapor polisi

karena laki pukul deng besi

garagara dia so kalah maeng judi

ini puisi juga mooi

depe besae rupa muka tikus mati

puisi manado memang bagini

pake bahasa pasar jengki

KALO MO IBARAT

kolo mo ibarat gubernur pe pencitraan

samua masalah beso rupa somo tamat

ternyata ini rayat depe hidop lebe hari lebe melarat

yang sanang cuma setang konglomerat

deng depe anak kerabat

gila memang ini pencitraan

ibarat ambor luda pa rayat pe muka

mo marah ibarat suara ta tutu deng toa pe citra

di manamana muncul huruhara

dari pana wayer sampe perkosa baku bakar rumah

ini pencitraan so ibarat dosa

pemimpin gorela mana rayat mo rasa basudara

ini daerah ibarat dongeng para raksasa

pemimpin suka rayat pujapuja

babantu orang vor cuma dapa publikasi media

di hati dia ndak peduli lebe hari rayat lebe cilaka

mo ibarat apaleh kasiang ni torang pe dunya

kurang mo manangis kong pakapaka testa

POLOTIK BEKENG GILA

polotik memang bekeng banya orang jadi gila

biar ontak tuturuga suka jadi bupati atau walikota

dasar modal cuma mulu rica deng tai mata

enter jadi calon ndak ada partai mo haga

ada partai kase calon modal gaga

sedang tapilih nentau mo bekeng apa

karja cuma rabaraba akhirnya maso panjara

karna bawahan so kase cilaka

adaleh tu manusia kapista nentau bicara

maso polotik vor jadi pejabat negara

lima taong wowo sambunyi kapala rupa tuturuga

mar studi banding ka manamana  cuma mo cari doi balanja

ini kastakasta bagus iko sama deng jaman jepang balanda

ika di pohong banyak laga deng bivi merah

supaya dorang tau bagaimana rayat pe menderita deng sengsara

jang ngoni kurang ja ambor tai gigi deng sagala rupa

TAI MINYA

di karangria,

waktu pae jadi bos pabrik minya kalapa
tai minya tong ja ambe vor pake momasa

tapi jaman so barobah
enter minya tanah so ganti deng gas
pabrik minya kalapa so kurang besi bakas

tai minya so pindah ke gedunggedung berkelas
dari jakarta sampe miangas
so jadi tai minya pe markas

orang manado memang paling karas
urusan tai minya deng baku gas
baku cungkel sampe samua jadi ampas

apalagi politisi pe gaya
enter pandeta dong suruh cuci depe kaki
dasar ontak puki
halhal suci dorang so kabirikabiri

no bagaimana urusan doi nyanda korupsi
pas bangung pagi so bapikir minya pe tai

kasiang skali rayat pe nasib
salah sadiki tembak di kaki
yang korupsi pe banya skali
dong kase biar pake dasi

ini cirita memang
tai minya pe mai!

BANYA YANG ILANG

PA TONG PE PANTE SAYANG

banya yang ilang  pa tong pe pante sayang

samua so taganti swalayan

rumah makang deng jalang

ingainga apa lagi ngana sayang

dari tumumpa sampe malalayang

tong pe kenangan so jadi tai ayang

tong ini so rupa anak piatu sayang

orang tua tiri bekeng suka deng sambarang

rayat kacili pe hidop kurang tongka deng tulang

tabiarbiar di kanokano deng kusukusu pe sarang

haga kalao anging barat batiop

haga kadara pikiran jaha ba skop

blumleh politisi pe mulumulu

kurang sigujusiguju janjijanji palsu