SASTRA SANGIHE TIGA, PUISI BAHASA SANGIHE IVERDIXON TINUNGKI

 PUISI-PUISI KARYA IVERDIXON TINUNGKI

PUNTALEBA

su siau pia tampa arenge puntaleba

su bangile bongkongbunu seng nahata

kere beke maralending manu kemba u langi

tahanusangkara kinawanteli bou sangi susi

sutempong datu Lokongbanua nekoa soa

ondong ulu pekakauhu daluase masaria

balagheng luhaung su pahesu masusi

nanualage talentu su manga ana u sengkatau

su tempongi puntaleba napohong bou tampane

nasapua kebi bekene bou kararangetange

balagheng kere lelang nairi bou batange

naenede nitandang leba isire tawe liaghane

SANGIANG

limangu simena su biwihene

mukaena lohong kadadimane

kukero gatine makakende naung ese

makaenede sakaeng su taghaloang taikaenane

naung sude tamawantuge sikau inang

ndai uta kere pinindu pesesirungang kendage

kemageng ene lanabe, lanabe ene nanggala daleng

kemageng ene selihe, selihe ene namedi dalung

inang kasiang taikasego kasadadae legene

langi dudarisi mendariahi beke susi sumatane

sumaka sarang naungu, kere sasaka petinggohang

sumaka ta sumaka ikau mang tatialang apeng

apeng meluase, lenehene lulaheku dame

luhena suelo, tumendang suhebine

nae na tumpe bawerang i watahi

i wawu maemuna mang simena kere wungane

kere wunga pungu limbawua su tonggeng winohe

mawira bou naung, mawirane ikasilo bou laude marau

kemageng naung kere sakaeng

sakaengku naparung sukapaparung winawa

naonode sugatine

nawuluse sukapapiane

tawe malukade hebine metahendung kapapiane

nakaghoghase badang, nakawasa mata kasiang

MUTEHUNG BANUANGKU BOU KOTOU KALAMA

dade siau, dala sangihe

dade dala mangpungu kalalusemahe tutune

bou koto wulude marange mang ikasilo kero banuangku

kaliomaneng metowo, gahagho medaukalu

sentinia dudamahi palahana medea lenehe sasi

su simpohone lenehe mapia mang su laude winohe susi

dasi su langi mamenongkati mangulide sawenahe

bawa suwedae Hapi Susi menggeliu toghase

metung tempo napeneu kasasese

upangangimang ariwe pate henane

SU PUNG TUALAGE

kukero su pungu tualage

mahia kero su delahu penindu

delang su langi mawantuge mawira

batu kendagu nengeliku wanua

maning dudalung pansiang

dumingang tualage suralohong kehage

kakanoa sukakapia

daluase tawe edone

BELADE PEBAWIAHE

kemageng pato pia senggone

biahe lai pia paliahengnge

matiti mutuhu suselihe

bahani manginsomahe belade

ndai kokadio nihiking pabawentale

ndai komalabo tawe takune menguling sakaengnge

dasi marange ghenghona duadateng manga yupung

mang dasi marange nangkhoda isasemba pulung

hinone megion tatarimakase su Mawu Kaselahenge

metuhu tentirongnge makakoa toghase pebawiahe