MANADO DALAM PUISI LIMA, PUISI BAHASA MANADO IVERDIXON TINUNGKI

 PUISI-PUISI KARYA IVERDIXON TINUNGKI

WAKTU UJANG FOTIFOTI

waktu ujang fotifoti

kita inga mama pe kopi

campur kanari kong colo roti

rasa hidop ndak ba rogirogi

saat skarang torang so sandiri

baru ta rasa orang tua pe arti

biar susah campur sedih

dorang pe cinta malakat di pipi

KENANGAN DI TEXAS

dulu di texas

gorontalo minahasa deng rengas

pe tampa paling karas

beda suku

mar nyanda bakubaku ramas

mar ngoni jang se tunjung muka ganas

pasti ada yang rako deng panta galas

inga texas

inga supit anto uche deng kalumat pe markas

abis pentas, di sana dorang baku gas

dari filsafat sampe dramadrama berkelas

drajin abis, kasegaran tumpah di galas

trus diskusi sampe depe ampasampas

akhirnya kurang punggu so jatung dari atas kas

TRAGEDI PALAPALA

mbak maaf kita so kincing ngana pe palapala
mbak maaf jang tersinggung kong marahmarah

abis torang pe pulau ngana so polo samua
jadi mbak maaf kita so kincing ngana pe palapala

mbak tersinggung kong marahmarah

dia ndak mangarti manado pe gaya bicara

pulaupulau ini tampa kita kincing dari kacili
pulaupulau ini tampa kita bera dari kacili
sedang skarang kita masih kincing deng bera di sini

jadi kalo pulaupulau ini ngana so polo samua
maka jangang herang samua kincing deng bera

tateru pa ngana pe palapala

bapabapa  yang tahormat

maaf kita so kincing ngana pe kapala
karna ngana lupa baca UUD 45 pasal 33

YANG BOLE MAKANG DENG NIMBOLE MAKANG

kukis putar boleh ngoni samua makang

babi putar cuma yang bole, bole makang

mar “setang putar” jang ngana makang

itu pa mantu pe suara

mo tada pa ngana kase ta putar

GARGANTANG

orang Manado ada istilah kase ilang aus

dong gate captikus

dasar gargantang rakus

laste kurang dapa di kakus

eso ulang dong kornaus

bakar manyala tolatola ikang fufu

dari pagi sampe malang etag turus

laste rupa ayang bakuku baku tarapu

lusa dong tada ulang

captikus campur kopi deng susu

dong bilang itu pukulan alus

laste kurang kase lari pi infus

tula dorang bale se ilang aus

mo tola dabudabu deng tustus

dasar gargantang rakus

laste kalekos amper mo mampos

gargantang Manado memang susah mo rumus

lebeh karas dong bilang lebeh bagus

bagate sampe so taingusingus

badiri tasiguju muka rupa gonofu di tampa fufu