MANADO DALAM PUISI DELAPAN, PUISI BAHASA MANADO IVERDIXON TINUNGKI

 PUISI-PUISI KARYA IVERDIXON TINUNGKI

ORANG MANADO BANYA ISTILAH

kalo benaut dia bilang fugado

kalo nemau dia bilang fugedes

kalo malas dia bilang meles

kalo gagah dia bilang neces

kalo fasung dia bilang kenes

kalo baterek dia bilang ances

orang Manado banya  mulu

bataria kuat mulu tarabe

banya mulu mulu rica

pang bamulu mulu karlota

carawet skali mulu perkici

banya bicara lalah mulu

pi ka jengki mulu kuala

orang Manado banya panta

panta basar dia bilang panta sambiki

panta babodi dia bilang panta gitar

panta tipis dia bilang panta tepos

lebih tipis dari panta tipis dia bilang abis panta

batang leher dia bilang panta leher

kalo so mulai marah dia bilang; ngana pe panta!

kalo so abis istilah dia bilang; tai yakis!

anak Kampung Arab bilang; maid jo

jang atik kukavo pa ente pe ulum!

DAM DAM KO

dam dam ko

ekor macang

sapa konto

depe panta pustema. garam

hidop kalabur

kalah bulubulu

mamantu ondersuk

dapa panta pustema. garam

dam dam ko

ekor macang

sapa konto

depe panta pustema. garam

gargantang tubir

bini sindirsindir

hidup lontang lantung

dapa panta pustema. garam

dam dam ko

ekor macang

nyanda konto

depe panta pustema. lemong

ROSES VOR NGANA

di ta pe hati nan bening

satu ika bunga kita titip di rindu

biar waktu lewat dia salalu mekar di kenangan

daongdaong boleh jatung

deng musim baganti waktu

roses itu cuma vor ngana

agar langit deng tanah basaksi kita pe cinta

yang nda pernah mati

yang nda pernah pudar

bahwa cinta itu salalu indah

deng hanya untuk ngana

Tuhan…

kita titip cinta di doa

agar setiap waktu ngana boleh pete

jadi bunga kehidupan cahaya kebahagiaan

hanya untuk kita berdua

hanya vor torang pe cinta

CA, MULU BASAR

Ca, ngana memang mulu basar

badang basar tolor basar

mar ontak tai sasaja

kiapa ini dunia so ngana punya Ca,

“Ca, bahaga ganas

depe hati mulai ta ramasramas”

Ca, ngana memang kapala basar

biongo paling basar

stel pande mar nol basar

so ngana no tu ontak udang paling basar Ca,

“Ca, badiri kage

langsung mangamu nyanda karuang”

Ca, kaskado

Ca, tai minya

Ca, panako

“Ca, badusu

rupa gaya setang gomutu

pake dodutu

akhirnya tagate di pintu

depe mulu tajumu di abu

lulo trus cibubu”

Ca, badiri tapi langsung tadudu

rupanya captikus so ojo depe bukubuku

kong supi ajar deng manucu

Ca, manangis rupa setang piatu

anakanak bagara mar dia so matikutu

bagitu kalo hidop so malimbuku

KASKADO

cuka minya

kaskado ngana memang banya tai minya

waktu jadi gubernur dari tanah sampe umur

samua ngana gusur kase maso liang kubur

biar so tua

banya calana masih ngana lucur

apa ngana pikir panta rupa pintu atou jandela

buka tutu iko ngana pesuka

kalo bicara ngana rupa dewa

mar ngana pe burung kakatua nda pake mata

ta salah langkah orang pe bini boleh cilaka

kaskado ngana memang bajingan

soal bajanji nyanda depe lawang

mo tunggu musti sadia umur panjang

bicara gorela, so ngana tu gorela pe nenek moyang

proyek apa yang nyanda ngana makang

enter yang siluman bekeng ngana kanyang

kaskado…kaskado

ngana memang baline gampang?