MANADO DALAM PUISI TUJUH, PUISI BAHASA MANADO IVERDIXON TINUNGKI

PUISI-PUISI KARYA IVERDIXON TINUNGKI

GARAGARA HOLEHOLE SO TAFIAFIA

garagara holehole so tafiafia

mintjedortje tatawa tangisingisi

amper somo taberabera

akhirnya laki jengkel kong skop dibukubuku

toki di ngomangoma

tada di bengabenga

sampe kaluar gabugabu

manangis satu malang langilangi jadi biru

kilekile bobou tarapu

adoh kasiang  bajalang takesokeso

dongadonga rasa putus

lia laki so ulang minung captikus

garagara captikus

mintjedortje jatung di pece

antar laki so saki berebere

gate trus amang

sampe ngana pe puruloku ta riberibe

badiri kurang deng dikidiki

bajalang ta tatetate

so itu kalo mo bartobat

jang tunggu nanti so ta tetetete

CEWE FASUNG ITU LAPANGAN GOLF

rupa bodi lapangan golf
kirakira bagitu kata anatomi cewe fasung

dari kuku sampe ujung rambu samua ta urus

nyanda ada bagian yang luruslurus

semua ditata dengan seribu jurus

kalo ngana pekantong kurus

apalagi muka kremus

pasti mati mo rumus

bagaimana mo endus depe mumus

karena dia lapangan golf

cewe fasung tantu rindu stik en  bola
setiap pukulan anu musti maso pa depe lobang
satu kali main bisa sembilan sampai delapan belas lobang
amatir professional tantu beda dalam urusan kase maso lobang

apakah ngana merasa fasung nona?

kalao fasung no ngana so rawat itu rumpu di teeing ground
rumpurumpu di fairway tantu musti datar en pende
di rough musti lebe panjang

pake ngana pe lipstick, ator ngana pe rambu
garis ngana pe kening

cewe fasung musti dapa lia fressko kong sadiki macico

ngana pe baju ngana pe kendis ngana pe manggoro

ngana pe singongo musti en musti noni en fress

en ingat cewe fasung musti kuasai pukulan

pukulan pertama dari teeing ground
daratkan dia di fairway atau di rough
di area putting se biar pemain memakai stik
agar bola tagulingguling gampang en sadap

berapa par for hari ini nona?
stroke play dan match play?
hitung ngana pe skor
kian sediki ngana pe besae kian tinggi ngana pe nilai

ah nona ngana pe bodi memang pocopoco!

pas ngana goyang patahpatah

rasarasa kita iko mo tacolo ah...

gorango bintang ular partola

kase jao kita pe hati dari gofela!

CEWE FASUNG  SUKA PI  LOMBOK

cewe fasung suka pi Lombok
karena dia fasung, dia suka pi Lombok

kalau dia ndak fasung, dia ndak suka pi  Lombok
pi Lombok musti fasung, fasung dulu baru pi Lombok

maka dengan semangat menggebu dia kase tinggal Manado
dia pi Lombok deng bekal fasung

kita sedih cewe fasung  itu pi Lombok
kiapa dia musti pi Lombok
Lombok toh sama deng kota Manado

matahari sore di Lombok sama deng matahari sore di Manado

gofela di Lombok sama deng gofela di Manado

kiapa dia musti ka Lombok

Lombok punya mall, Manado punya mall
Lombok punya laut, Manado punya laut
yang ada di Lombok, ya ada pula di sini
kiapa dia lebeh pilih pi Lombok

lewat inbox FB kita batanya;
“kiapa ngana lebeh pilih Lombok?”
“di Lombok dorang pe HIV kurang!”
“wah apa depe hubungan?”
“kita pi Lombok vor baku bahagi HIV di sana!”

cubiraka! setangputar

untung kita ndak ta colo!

ECENG GONDOK PA BUPATI PE MATA

eichhornia crassipes  itu eceng gondok pe nama Latin
di Indonesia enceng gondok, di Palembang kelipuk,
di Lampung ringgak, di Dayak ilung-ilung, di Manado tumpe

“yang pasti di Sanger bukang nune”

oi to po!

eceng gondok  pertama  bartumbuh di amazon
eceng gondok kedua keade kita lia di bupati pe mata

ah cilaka!

mar bupati bilang

eceng gondok itu ecengecengan saja

“biar jo ecengecengan timbultimbul  di ta pe mata”

“jang ngoni karlota”

“kalo kuala deng danao diserang ecengecengan

ngoni ndak usah nae darah”

“itu kita pe urusan,” kata bupati  deng nada ndak karuan

karna depe hidop so malimbuku deng ecengecengan

co ngoni lia

di saluran kekuasaan mana ndak ada ecengecengan

di manamana semua eceng. ecengecengan menyebar

cepat dan eceng

eceng di badanbadan pemerintahan, eceng di dinasdinas keinstansian
eceng di manamana.  eceng tumbuh ka manamana

ka manamana ecengecengan beradaptasi, mengapung,
berbuah,  bartumbuh en memang eceng

“pak bupati, ecengecengan so ancam air danou”
“pak bupati ecengecengan so bekeng sasa kuala”

“pak bupati ecengecengan so tutu jalang aer pi ka sawah”

bupati dengan enteng manyao;

“yang penting dia nyanda tutu jalur doi ka kita pe popoji!”
sambil bajalang deng gaya bingobingo yaki

LOBANG

di manamana lobang
lobang jalang
lobang trotoar
lobang jambatan
kota ini kota lobang

punung lobang

walikota lobang tau depe kota banya lobang
tampal satu dilaeng tampa lobang

ada lobang butulbutul lobang
ada lobang sangaja dong bekeng lobang

walikota lobang tau lobang butulbutul lobang
atau lobang sengaja dong kase lobang

lobang anggaran, lobang kekuasaan, lobang atoran
walikota lobang tau arti samua lobang

lima taong periode kekuasaan
walikota ta lobanglobang

abis tanaga urus urusan lobang

tampal lobang bekeng lobang

koronkoran batulis lobang  vor tampal lobang
LSM bataria lobang vor prop lobang

PNS iko lobang manjae lobang

DPRD lobang studi banding soal lobang

musim pemilu samua calon lobang bajanji nyanda bekeng lobang
klar pemilu lobanglobang lebeh tabuka lebeh lebar lebe banya

lebe soe bauni tivi lobang langsung dapa dengar lobang

aparat hukum lobang jatung di lobang
turis lobang tasiguju  di lobang
rayat lobang planteng ka dalang lobang

bicara lobang ternyata bicara cilaka
samua perkara lobang depe ujung maso lobang

orang miskin gale lobang tutu lobang
orang kaya lebeh kaya dari hasil baku bekeng lobang

laste samua taisi panjara kong mati maso lobang