MANADO DALAM PUISI SATU, PUISI BAHASA MANADO IVERDIXON TINUNGKI

PUISI-PUISI-KARYA IVERDIXON TINUNGKI

LAWER MUKA GAGAH

pakapaka gabagaba

jang salah paka orang pe palapala

dulu di jaman baehula

kurang goraka kase baku dapa

sekarang jaman so beda

angka telpon langsung baku dapa

mar jang kira nona so suka  pangana

kalo lawer biar muka gagah

enter gofela bapikir mobatera

so itu nyong kremos lebeh laku

karna dia tahu ni hidop pemalimbuku

karja karas  sampe tawiuwiu

mar isi dompet bumbung merah biru

TUKANG OBER

tanta tukang ober

mulu lebar rupa ember

dari januari sampe desember

kurang dariberibe urat leher

tanta tukang ober

baku dapa om raja mo saguer

di warong minung dekat sonder

dong dua bacirita sampe tapancar lenderlender

pas di bulan oktober

tanta tukang ober kaweng deng om raja mo saguer

cuma sampe bulan november

rumah tangga so ancor garagara mulu deng teller

MANADO UTARA

ada tamang bilang

Manado Utara tampa jin buang anak

ini kata memang bekeng nae darah

karna dapa rasa rupa jabahina

mar pikir para pikir ternyata benar juga

dari  gudang sampe lokalisasi kusta

dari panjara sampe tampa buang sampah

samua  dorang curah di Manado Utara

mar tengah deng selatan jang dulu angka dada

so di sana tu tampa jin bekeng anak sampe baranak

dari pub sampe mall, dari  kantor sampe kampus

samua di Manado tengah deng selatan

so di tampa sadap bagitu tu setang pe maumau

baku dapa deng baku kasta

BICARA MANTAN

bicara mantan sama deng momasa santang

lebeh lama lebe picah depe minya

apalagi kalo umur masih magori mayang

depe manis bekeng rasasuka babale ulang

mar kalu cinta cuma panaspanas tai ayang

enter gofela tau tu arti mo isi gargantang

jangan harap mantan babale haga kong sayang

ngana petaiminya so bekeng dia muntah kasiang

mar lebe bae jang bicara mantan

kalo ngana pe hidop lapungu ndak karuan

kasiangte dorang mohaga

dapa rasa rupa panah tatikang di dada deng taripang