SASTRA SANGIHE LIMA, PUISI BAHASA SANGIHE IVERDIXON TINUNGKI

 PUISI-PUISI KARYA IVERDIXON TINUNGKI

KEMAGENG SU KOTO WULUDE

Kemageng kau su koto wulude

Tahendunge mangatuari su wedae

Onggoko daleng su tau samuri

Sumaka mudea tadentene

Ariwe hentang dangene

Seng taikasilo kereapa gatine

Bawa su lesabe sakaeng iulide

Biahe ko musulung daleng tumepase apeng

Kasiangsiangnga tau tanakarea daleng

Kukaka tai karingihang, kukia tai tehungang

Kemageng seng marange kai

Seng tamaka toto dempuge masana

Ndai ko masana

Nitangabe mubiala ondole kasasusane

TEMPONG SAWENAHE

Dasi su sangihe egegua

Katiue sawenahe marasai

Singgesa sakaeng nubalintakube

Suapeng iupung simena sasangi

O darua tembonang marange

E pai naonode lanabe su hangke

Simbau sarang kuaneng tutiring

Simbau sarang kuihi mangantibe

Su apeng mengkete kakakae mangarario

Kumaka apa bageng tuli nataka selihe

Ungkung gaghurang sasasa horo abe papelo

Pakadisie su elo su leto apang mapia

kai dasi su sangihe egegua

sarang sinasa nawelise tanakaonggo

pirua palahana kadio

naempise laede isire ko mararange

SAKAENG LESU

Kasiang ariwe sake sakaeng lusu

Ko tamawantuge sarang pamunakeng

Mawuna we suapa

Kere naparung su laleng tawe tatialane

Metung masina tambang dalung

Mang mawontole su sasi madalung

Metung senggo tambang kaliomaneng

Berang kereapa sasilaka nidadeakeng

Ketang manu mengkilo sudadorokang

Taumata mateling kotawe kadaleokang

BEKENG ANA SAMURI

Su tempong horo

Ana samuri nihiking su susane

Su tempong i

Ana samuri tawe baliawane

Sipire paka sipire

Ketang mauli subekene

Onode tingkaonode

Nakoa batang tawegunane

Pai su sitaro

Ngarangara katoang labo

Baline gampang kalabone

Kebi banuang nilahekune

Kemageng kau nusalatiti

Singkanawo nipelohe kere balawo

O pirua ana samuri

Kere bengkeng ansuang bakeng

 Tumuwo malaluhe

Mang masungkude su kombang politike

TANATA

Pia tanata su Mandolokang

Dalai abe karoro, mapia kadeho

Sasasa ndai pelo su peto

Su sakaeng biahe masasenggo

Kemageng sumaka sarang binawa

Tentiro mengaha langi susi marange dasi

Karange koto kaliomaneng bou hamu laharape

Bou dukalu kaselaheng

Biahe i kite kere leto su elo

Naparung su bewelo

Kapia sinasa mapelo

Sarang paliaheng botonge mahagho

Susirung su tanata

Singkasirung sukapapia ruata