PUISI-PUISI KARYA IVERDIXON TINUNGKI
MANADO
MEMANG BEDA
Manado memang beda
dari semboyan saja: torang samua basudara
mar kalo baku marah langsung angka peda
lebe cilaka lagi kalo pake peda sanger mata dua
rimbas kiri rimbas kanang
jangankan musuh enter sudara tapelapela
bulungle kalu kampung deng kampung so baku bela
memang kwa langsung taamborambor rupa gofela
bicara pesta, o tuhil so Manado depe raja
selain makang pasti ada katrili deng volka
badansa ala Portugis Spanyol deng Balanda
memang taangkaangka enteru rok deng beha
kalo di pusat kota jang ngoni tanya depe beda
cukup lia kong haga
dari stan so kantara
mana tu Manado pe gaya
PUISI
BATANANG
tanang nangka babuah nangka
tanang mata babuah apa
tanang panta bekeng bardosa
tanang dada makang puji
tanang ubi pangge papancuri
tanang diri saki sandiri
tanang budi jangan pikir ngoni motagi
SOLITAIRE in
CEREME
di dunya ini
cuma ada satu cinta
deng cuma satu kali mo baku dapa
entah dalam nikah atau cuma baku haga
yang pasti, itu yang paling torang inga
yang selalu bekeng torang bahagia
entah deng tawa atau deng aermata
dari waktu muda sampe so oma opa
di dunya ini
banyak hal memang susah mo rumus deng katakata
cuma boleh takser deng rasa atau deng cara basapudada
satu saat kalo kitorang sadar ternyata sore itu
so oranye depe warna, itu tanda kitorang so tua
kitorang mulai lupa nama deng tampa
dimana torang pernah manangis atau tatawa
cuma cinta yang salalu torang nya lupa
dimana pertama kitorang baku dapa
deng rupa apa depe rasa pertama kali baku haga
entah di sekolah, di jalang, atau di tanpa yang ta
ingainga
samua kitorang memang punya cerita
sandiri atau berdua
tentang cinta, tentang jalang vor datang
juga vor pulang baku dapa deng dia
karna di dunya ini
cuma ada satu hal yang paling ajaib
cinta!
SPORTER
bicara sporter sepak bola
Hooligan Inggris memang gila
apalagi gaya
nekat Bonek Persebaya
mar samua nya lawang Amurang punya
dorang pegaya dapa
lia biasabiasa
mar kalo sampe
Amurang kalah
dorang pi dukung pemain
lawang
kong bahurahura
rame ron lapangan
itu no depe nama
dukung Amurang
sambil ba dukung
sambil ba ramas lawang pe biji
jang kira lawang
manangis karena sanang skali
pas lapas biji so
gomu kong flao nentau diri
no kalo
kesebelasan parampuang yang main
tantu ngoni pikir
bingo mo ramas dimana
depe cara dorang
purici di pipi deng gaya unyuunyu skali
laste pulang
untung mar muka bangka rupa sambiki
mar sporter
politik yang paling bekeng saki hati
bilang pendukung
so pe banya skali
lengkap deng
daftar nama sampe nama orang so mati
samua calon dia
pigi cuma vor cari doi
datang waktu
pemilihan calon kasiang malo sandiri
depe pemilih dapa
hitung cuma deng jari
bagitu no sporter gaya
babi pe babi
KORE BAKU KORE
orang manado ada hobi kore baku kore
mar awas jangan salah kore
tasalah kore di tampa bekeng totofore
dorang paka sampe gigi samua rope
urusan kore sama deng urusan bakukode
kore di tangang depe kode tamang
kore di pinggang depe kode sayangsayang
kalu kore di biji mata, itu cari cilaka
dorang tarapu sampe bangkabangka
bulungle ngana trima dia momake dari binatang
sampe nenemoyang deng setang pe nama
ta cumucumu samasama deng ngana pe papa
deng mama pe nama
mar kore juga bekeng simore
apalagi yang bakore cewe vasung rambu pirang
itu depe kode burik pangge manyabung di utangutang
mar kalo yang kore tanta gode batagi utang
memang langsung totorofe rupa muka babi utang
kalo laki bini baku kore
itu kode sasadiki somo bobou pondang
campur ikang garang
karna yang takore di tampa asangasang
Tidak ada komentar:
Posting Komentar