SASTRA SANGIHE DUA, PUISI BAHASA SANGIHE IVERDIXON TINUNGKI

 PUISI-PUISI KARYA IVERDIXON TINUNGKI

KLIKITONG I GHAGURANG

dasi dudaledu dimesung bou tampuna

klikitong i gaghurang mapakaiboru soang tarorane

tagonggonge bou kalu nipile su eloNe

nanaungange bou kipung nihana bituing putung

tingihe ene makadeli naung nairi

makaghenggang sisire tawe sasaliline

naung dalai kimoho, naung mapia kukero

sasalaine nuhengke sasasa marange

waugu bou marange kapapia timedo

mawengi kere lanise su wadang i nabi daute

kararange kawasang daute

mang kimia sutengong Mawu

embung ditambung su wadange

nutingkasana su laede Yupung Kasaselahenge

kemageng klikitong bou marange dudellu sutadentene

balagheng banuang seng nikakawing su kakendagene

laude tutipu, buludene dudaondole

sasaharane mang mangaha kapapiane

ndai daringihe lagung susi nionggo Hapi Makendage

pundale singkapundale, toghase ala su pung tualagene

MANU PUNTENG

sihelo su lasiri

sihelo su lehingambeng

eloelo muleno kakangianeng

magurang takoae ikaneng

kere sego manu punteng

hambake ketang dumaleng

katelae lumiku daleng

pondole nahutung sulalaleng

dumaleng tawe naunge

mahumpa tawe regane

BAHANINGNUSA

teking isai pai napapasi su wulude tamata

mang kukero tehungang bou apeng ulu

taking i yupung mateling nakakoa kararatuang

napasi sau su kawahaning i datu winsulangi

kawawahaning ene nekoa sasasa manandu

sinasa i bahaningnusa mendiaga banehang sekasaka

baneha su peto sakaeng i hengkengnaung

su limane bara luhena putung i aditinggi

kemageng banehang seng nataing su koto u naung

tawe takune susirung su kelung ikebi yupung

mulaude sarang kararau laude

tagonggonge matataing surange langi

i datu dingang pulunge singkabekise tingguhu

mawengi kere mauhala, demeli kere putungkara

HUNDUGU U SAKAENG

mebua bou hangke pia bawerane

metaing dolong pia dudatone

ene hundugu u sakaeng

dolong dingang ulinge susimpoho raramene

daleng singkalaleng, lempang singkalempang

darodo matelang mepapahia kai dalong kahengang

toghase banuang mawangung kere woiang

tinendeng su medang lidana pello su walang kama

kapapia bulang limangu nihundugu limang ambia

bahe marasai taikatemang, kakaliomaneng tatahulendingang

MEBIO LAUDE

sangi i Uring Sangiang nakasombo banuang

nasombo wou taghaloang, timuwo nakoa pesesirungan

dasi Aditinggi kararatuange

sutaghaloange Mawendo mekoa dame

ndai bio wou tempong Badolangi

--wera dalai kanawo, wera mapia kadeho—

kapia kere daroa nedaukalu

maraluhe nekoa tatialang lesaba manandu

ana u sengkatau mamogho matalentu liung talentu

ikasilo su gundene dalaleng pato sulenehene

isai mataku laude tamahumpa apeng kendagene

biahe kotakonsanguapa ghenggona nangkodane