PUISI-PUISI KARYA IVERDIXON TINUNGKI
BICARA GAYA
bicara gaya manado so nyanda lawang
biar hidop kurang ba utang
mar tu stan memang bekeng tako setang
ini sebenarnya yang torang musti herang
kiapa torang hidop kurang bakubaku lawang
ba aksi deng cara nya karuang
akhirnya orang kurang dusudusu utang
kiapa torang nya balajar pa torang
pe nene moyang
rajing karja deng salalu sambayang
lia tu hasil sawah deng ladang
kurang tu tangang nya mampo pegang
harusnya torang musti tahu
ni hidop tasandar pa Tuhan pe sayang
bekeng apa ba stan kiri kanang
akhirnya enter mo makang bekeng kasiang
GARA GARA BAHASA TABUBALE
bicara manado
tulen
so ua paling span
en keren
memang stengah ogob
mar ua pe nyali
paling beken
sapa ndak kanal pa
ua anak sabla aer
jago bahasa manado
dari cubiraka sampe hibop
bahasa tabubale so
ua yang paling top
saribu aid bilang
ubiras
pi tidor aid
bilang pi rodit
mo pulang aid
bilang mo ngalup
mo ba gate aid
bilang mo ba etag
babi aid bilang
ibab
sebe aid bilang
ebes
cuma ibu dia nemau
bilang ubi
soalnya pernah
enci lucy cigicigi
garagara dia ba
baca; ini ubi budi
satu kali ua jatuh
cinta
dia ser nona vasung
kampong cina
maya cia karenina
kancingan cina
borgo arab minahasa
no ngoni bayangkan
jo depe vasung bagaimana
kalo nyanda rupa
sinderela jang bilang kita
mar bukang ua
kalau nyanda nekat
dia kira cinta
sambarang tada
hidop lawer rupa
gorela
mo suka nona muka
sinderela
kasiang badang
bongko mamaruga
mar ua bagaya stel
binaraga
dia kira boleh garta
maya pe papa
raja kontao di
antero ampa lima
pas sampe pa maya
pe pintu rumah
maya pe papa dola
kong haga stengah marah
ua pe dada
langsung barasa somo tacabu nyawa
ua babale kong
tumingkas rupa setang kanal goraka
mar cinta so
ditesta
ngoni kira ua mo
menyerah
depe eso ua ba bale
ulang
pe mujur apa maya yang
buka pintu rumah
ua pe dada
langsung rasa babungabunga
persetang deng
sgala tatakrama
ua langsung tembak
deng bahasa tafuraga
“ayam atik akus pa
ente yam!”
sondor manyao,
maya lap uang pe mulu
jangankan ua pe
cinta
enter ua pe bibir
langsung pica kong bangka
so ini tu ua pe tasoe
gaga
garagara suka kase
tabobale kata
akhirnya gigi
amper patah
ANDAI NI LAO JADI CAPTIKUS
om buang salalu
bapikir
andai ni lao jadi
captikus
so ndak baku marah
deng bini
cuma soal doi gate
sadiki
mar om buang pe
sadiki
depe banya susah
mo kali
amper tiap jam
bage satu sloki
satu kali sua depe
sloki gelas kopi
memang soe dapa
laki rupa om buang ini
pe buka pagi so
bobou tikus mati
bini dimana nyanda
mo lari
so susah masihleh makang
hati
CIRITA OM OPE
mamang kasiang
bejamin simore
garagara rope dong
sarani jadi om ope
mar itu karna
katulah pang ba sosere
bibir taribe so
nyanda pampele
pas baku dapa di
tampa balobe
om ope cirita:
ini samua garagara
golojo erwe bebe
pidis ciraro
riki jatung pas pi
wese
gigi tafia bibir
polote
so itu jang ngoni
ba sosere
kalu katulah bage
nyanda ada yang
boleh pele
untung kalu cuma
gigi jadi rope
mar kalo sumbing
no ngana rasa depe
besae
EPENG PE JURUS
BAKODE HARIM
epeng cowo sindulang
muka pantera mar badang kurus kering
dapa harim orang tuminting
muka vasung mar rambu keriting
karna ni cirita jadi ditaong blung ada hape
kalo bagadang musti ada jurus baku kode
salah kode jang harap harim datang bagepe
kurang kage pontiana deng songko so rebe
malang minggu pertama
epeng lewat pa harim pe rumah
sambil manyanyi:
bulang pake payung totoruga batolor
harim kaluar lewat jandela
badekat pa epeng so tunggu di pohong pakoba
bacirita indehoy sampe pokapoka
riki mata punung tai mata
malam minggu kedua
epeng ulang lewat pa harim pe rumah
sambil manyanyi:
bulang pake payung totoruga batolor
harim kaluar lewat jandela
nyanda sangka depe papa dapa lia
supaya papa nyanda curiga
harim purapura pi bapunggu pakoba
malam minggu ketiga
epeng ulang lewat pa harim pe rumah
sambil manyanyi:
bulang pake payung totoruga batolor
blung te epeng pe lagu abis
dia so tasaleng planteng tamaso ka got
harim pe papa so stot tada kong skop
mo apale epeng
jangankan mo batolor
enter depe totoruga so biru di dalam calana color
BUKANG ONGOL ONGOL
ini puisi bukang sekadar sagu deng gula batu
ta ojoojo di kalapa biru
yang torang sapu deng kopi tumbu
ini puisi tentang hidop malimbuku tasiguju
mar tetap kuat nentau maraju
abu kalu abu
nyanda peduli biar so kaluar gabugabu
ini puisi memang semboyang kaskado biru
karna manado asli nentau lari kalu mancari
biar so tawiuwiu dia tetap bakuat baku tarapu
Tidak ada komentar:
Posting Komentar